【波司登中期業績勁靚仔,但balance sheet條數有啲古惑】

財經卒仔

波司登中期業績勁靚仔,純利派息大升超過三成。但balance sheet條數,有啲古惑。

似乎係為咗谷大條銷售數

貿易應收帳─即係賣走而未收錢條數,半年內由8.76億人仔急升3倍至近36億,多咗成27億。喂,半年收入都係54億咋,即係一半都係數期。波司登做批發多過自營,大部份貨批俾佢啲franchise做。而家條數期大咗咁多,似乎係為咗谷大條銷售數,頂埋錢俾零售商做生意。咁做好唔健康,因為你唔知零售商究竟真係賣晒啲貨,定係存咗係度。想當年安踏、李寧,就係咁樣壓貨俾零售商,零售商攪唔掂、賣唔晒,就開倉賤賣,做cheap晒個品牌,最後李寧呢啲品牌商,又要攞真金白銀同零售商回收返啲鞋。

波司登現金流

睇埋波司登現金流,經營活動現金流係負數!流失咗12.23億,融資活動都係負11.21億,估計係攞黎派息,只有投資活動係淨流入24.93億。即係佢沽咗啲金融產品,攞25億黎派息同頂住盤生意既現金流失。如果淨係睇新聞報條大數,有時中左伏都唔知。損益表要睇,資產負債表更加緊要,好多古惑野,都收埋係balance sheet。

*此文章由專欄作家:財經卒仔提供

FB: 財經卒仔 (https://www.facebook.com/FinSmallSoldier/)

IG: @finsmallsoldier

免責聲明:本平台發佈的所有投資分析技巧,只可作參考用途。市場瞬息萬變,讀者在作出投資決定前理應審慎,並主動掌握市場最新狀況。若不幸招致任何損失,概與本平台及相關作者無關。而WavingCat旗下網站或社交平台的網誌內容及觀點,僅屬筆者個人意見,與WavingCat立場無關。WavingCat對因上述人士張貼之資訊內容所帶來之損失或損害概不負責。

WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師,WavingCat都會幫你捉緊錢途。

Follow我們 Social Channel 得到最新資訊 : IG: wavingcat.hk FB: WavingCat招財貓


上一篇文章【Uber CEO放風聲 未來將在有條件下接受加密貨幣】
下一篇文章【瞓身加入元宇宙 麥當勞建立虛擬餐廳】