而家個情況就好似打風失收，攪到啲菜價貴十倍，如果而家要你去評估一塊菜田價值，斷估你唔會拎打風個菜價去做估值掛？但股市真係會，股市通常都過份重視短期，而忽視長期，特徵係短視、無耐性、善忘，我地最好就係做佢對家。
Table of Contents
我地最好就係做佢對家
講返季績，收入按年持平，純利大隊一半，扣走投資收益、減值撥備等既非國際準則純利都要跌23%，都算係騰訊經營史上少見，但睇返而家經濟放緩、疫情、政策打壓啲咁PK既情況下，又唔係話好出奇。
廣告係經濟天文台
廣告業務係首當其衝，經濟唔好，廣告肯定係頭幾樣俾人cut budget既部門，騰訊自己marketing開支都縮咗。仲有就係監管打撃，上年首季，教育、遊戲等廣告大戶仲未俾阿爺郁，但今年呢啲廣告收入已經大減。另外，我懷疑仲未有廣告收入既視頻號多人睇咗，會令到微信其他地方既用戶時長少咗，連帶廣告收入都少咗，情況同FB相似。所以騰訊廣告收入按年大跌18%，第二季應該再衰啲。原本管理層諗住今年下半年廣告收入會重新正增長，事關監管啲衰野2021年下半年都已經出現，而且騰訊諗住下半年視頻號開始落廣告，但由於大陸疫情唔知幾時攪得掂，可能會推遲咗個pickup時間。Any肥，推遲就推遲，長期黎睇唔係好重要。
版號重開無有怕
遊戲總收入無增長，國內收入跌1%，國際市場升4%。都係啦，上年首季，大陸仲未加大未成年人限打機令，今年頭兩季按年都會差啲，但下半年呢個影響基本消失。反而國際市場增長放緩咗，公司話因為海外後疫情正常化，個個正常返工返學，少咗時間打機啦。騰訊遊戲好穩陣，無嘜好擔心。國內遊戲黎講，最重要係4月時重開咗版號。但4月份批出既版號只有45隻game，比起以前上百隻game，少咗好多。管理層認為以後都會咁少，騰訊應對既方法就係精品化，集中資源做好少量既game，咁樣就可以善用少量既版號。好明顯，少咗批版號，遊戲行業會更加集中去大廠，騰訊就係最大個間廠，所以少咗批版號，對騰訊分分鐘係好事。 金科及企服係唯一分部按年有增長，但都只係10%。金科主要就係微訊支付，由於疫情，經濟活動大減，支付增長少咗。企服就直頭按年跌左啲，主要係騰訊一改以前為求market share，不惜做蝕本生意，而家更加追求高margin既生意。
馬化騰終於爆了！
係人都知，騰訊由高位插咁多，科網由高位插咁多，唔係完全因為短期既業績問題，而係大陸瘋狂式打壓，攪到個個都企埋一邊，睇定啲先算。但而家明顯風向已改，最近汪洋同劉鶴對互聯網平台既支持言論就係實證。Martin喺業績會都講明已經feel到政府高層既改變，而且支持互聯網平台會有個次序，首先清楚講明俾各級官員打壓到此為止，而家變為支持；之後放鬆管制；最後出台實質支持政策。尋日馬化騰罕見轉發咗一篇文章《除了胡錫進，沒人關心經濟了》，更加引述一小段，串啲網民成日講企業可以破產，但唔可以裁員；企業可以破產，但唔可以加班…但如果佢地叫外賣遲咗十分鐘，即刻小晒鬼，鬧起上黎比邊個都勁。連一向低調既馬化騰呢個時候都夠膽放負，應該又可以玩多幾年。
目前倉位
騰訊(700)41.0%；利亞(831) 22.7%；平安(2318) 13.0%；Meta(FB) 9.1%；國際家居(1373) 10.8%；盈富(2800) 3.7%；現金 0.5%；除淨後未派股息0.2%。回報：今個禮拜組合上0.4%；15/3/2022中午開倉至13/5/2022回報率：11.7%；組合現值：1,117,420。
* 此文章由專欄作家：財經卒仔提供
Facebook: 財經卒仔
Instagram: finsmallsoldier
免責聲明：本平台發佈的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本平台及相關作者無關。而WavingCat旗下網站或社交平台的網誌內容及觀點，僅屬筆者個人意見，與WavingCat立場無關。WavingCat對因上述人士張貼之資訊內容所帶來之損失或損害概不負責。
WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師，WavingCat都會幫你捉緊錢途。
Follow我們 Social Channel 得到最新資訊 : IG: wavingcat.hk FB: WavingCat招財貓
